IES Emilio Alarcos

BON BRANU PA TOOS

2006-06-15T21:46:00.000+02:00

Esta, neños, ye la última entrada del blog esti cursu. Nella quiero deseavos a toos un feliz branu. Pasáilo perbién y garrái fuercies abondes pa entamar el cursu que vien, que cada vegada ye más duru.
Aprovecho la ocasión pa dicivos que la vuesa compañera, Marina Mayo Alonso de terceru A, ganó un concursu de cuentos pa rapacinos n'asturianu. El día 14 de xunu foi la entrega de premios. Por esi motivu ficimos delles fotuques que podéis ver equí. Nelles ta la ganadora lleendo'l so cuentu : Añada al mineru; tamién podéis ver a los pas y dalgunos miembros del xuráu como Marta Mori y Roberto González-Quevedo, dos grandes escritores na nuesa llingua. El diariu cultural asturianu ASTURNEWS fai una reseña del actu que podéis lleer equí.
Namás, esto s'acabó. Espero vevos l'añu que vien; si nun ye asina, mándovos un percariñosu besín pa toos. MERCHE.

SACA LA LLINGUA

2006-05-10T18:12:00.000+02:00

Güei, 10 de mayu, los neños de Llingua de Xixón fueron a los III Alcuentros de la Mocedá cola Llingua. Esti añu fueron nel teatru Xovellanos. Ellí taben escolinos de tolos institutos de Xixón que tienen l' asignatura de Llingua Asturiana y, ente ellos, el nuesu, l'Emilio Alarcos. Fuimos y volvimos en bus. Ficimos fotos. Tamién pel camín y nel teatru mientres esperábemos peles actuaciones.
Ellí viemos actividaes tan prestoses como les que vienen darréu:
*Un monólogu de Cellero.
*Un videu d'ellos mesmos trabayando pola llingua.
*Otru monólogu de Benxa Pérez ( de Ha-Xareos)
y pa finar
*Un conciertu del grupu más consolidáu de la nuesa música, de la música n'asturianu: Dixebra.
Que nun se m'escaeza: portastisvos perbién.
PUXA ASTURIES.

MÚSICA N'ASTURIANU

2006-05-02T20:28:00.000+02:00

Na clas de segundu de la ESO tenemos un rapacín, Xandru, que toca nun grupu musical. Ellos llámense Ásperos y toquen música punk. Tienen páxina web onde pues ver semeyes del grupu, un pocoñín de la so historia, los componentes, la so discografía, un foru au-yos puedes mandar mensaxes, descargues y enllaces. La so direición ye www.asperosxixon.tk.

MÁS POEMES

2006-05-02T19:47:00.000+02:00

Sara Moreno Ordóñez, de primeru E vuelve a repetir. Fizo otru poema perguapu. Equí lu tenéis:
¡Cómo me presta la sidra asturiana!
Seya dulce o dea acidez
anque a la mio patria igual vuelva mañana
Asturies siempre recordaré.

Muncha xente conocío
a toos estrañaré
pero sé que na mio alma
siempre los tendré.

Asina'l so paraísu natural
asina la so xente
asina la so playa con sol
asina siempre na mio mente.

UN POEMA MÁS

2006-04-21T20:15:00.000+02:00

Por fin animóse un neñu a facer poesía. Yá yera hora.
Hasta agora namái lo ficieren moces. Por fin un neñu.
Carlos Iglesias, de segundu A de la ESO.
Equí tenéis la prueba:
Neña, yá pasó un añu,
nun lo olvido, mancástime,
nun quiero volver a vete
yes igual qu'un escarabayu
metíu ente'l mio pelleyu.
Nun t'aguanto
enxamás lo olvidaré
engañástime con Rafael
el mio meyor amigu
el guah.e qu'enantes dormía contigo
pero agora yá sabes lo qu'a mi me pasó,
engañástime y nun sabes cómo ocurrió.
Yá sabes el dichu:
"recueyes lo que semes".
Por eso t'escribo
el mio universu t'enseña
si xuegues con fueu
acabes siendo la lleña.

Carlos Iglesias, 2º A.

CARTELOS PAL CONCURSU

2006-04-03T19:20:00.000+02:00

Equí tenéis unes fotos si queréis ver trabayando a los neños de terceru de la ESO mientres facíen los cartelos pal concursu. Yera sobre'l teatru n'asturianu. Ficieron dos, ún cada grupín. Quedaron perguapos. A ver si tienen suerte y ganen.
Que nun se m'escaeza: quiero dar les gracies sobre tou a Marina y a Eva, elles saben bien por qué. Gracies neñes.
Los dos cartelos participantes podéis velos equí.

LLECTURES PA LA TERCERA EVALUACIÓN

2006-04-03T18:45:00.000+02:00

Los alumnos de segundu y terceru de la ESO tenéis qu' escoyer ente ún de los que yá tenéis un pocoñín más p'abaxo. Los de primeru podéis amestar a la llista estos tres:

Lina, de Xosé L.luís Rodríguez Alberdi
Les aventures de Xicu y Ventolín de Vicente García Oliva
Xicu y Ventolín en vacaciones, tamién de García Oliva

RECETES

2006-03-16T18:17:00.000+01:00

Los alumnos de segundu de la ESO ellaboraron unes recetes de los cuatro platos más conocíos de la gastronomía asturiana. Dos primeros platos y dos postres: fabada, pote, casadielles y frixuelos. Si quies saber cómo se fain, pincha.

AVENTURA NA MINA

2006-03-08T18:59:00.000+01:00

Óscar Barros, de primeru E de la ESO fizo, como trabayu escolar, esti cuentín perprestosu sobre una aventura na mina : Esto yera una vez un día nel que quedemos los mios collacios y yo nel quiosku'l pueblu pa dir d'escursión: Nel, Xosé, Xulia, Sabel y yo. Somos un garrapiellu guah.es llanzaos dispuestos a pasalo bien anque de xemes en cuando somos un pocoñín medranosos. La escursión yera pa dir al monte y tuvimos un ratín per ehí caminando y oyendo glayar a los paxarinos, observando... ¡qué guapa ye la naturaleza!
Llamónos l'atención a toos un montón de fueyes y cañes qu'había amontonaes nel suelu. Ente Xosé y yo apartémosles pa mirar y ¡sorpresa!, yera una mina abandonada. Había un cartelu que ponía: PELIGRU MINA. Les guah.es teníen mieu, pero Xosé y yo animámosles pa entrar; la verdá ye que lo que yera la cueva daba un pocu mieu y taba puerca, y amás la mina yera mui baxa y los pasillos mui estrenchos. Andábemos los cinco pegaos pa nun perdenos, menos Nel, que diba separtáu y paecía que nun tenía mieu, como si fuere d'otru planeta. Siguimos caminando y atopamos como una puerta que s'abría y vimos un cofre enllenu perres. Nós, namás velu garrémoslu y marchemos, pero de sópitu oyimos la voz d'unos paisanos qu'entraben diciendo: -Güei, otru bancu. Vamos guardalo. Tápalo bien pa que naide lo atope. Pillárenmos. Nun sabíemos lo que díbemos facer, pero, como cosa de maxa, entamamos a desapaecer. Les partes del nuestru cuerpo esborrábense y apaecimos fuera la mina. ¿Qué taba pasando? ¡Yera Nel!Al paecer tenía poderes pa orbitar a la xente. Namái lo sabíen los pas, porque la ma d'elli tuviere dalgunos problemes nel partu. Agradecímos-ylo muncho, repartimos les perres y a empezar una nueva vida: Nel marchó a una escuela de superdotaos a Canadá. Xosé marchó a vivir a un xalé a les afueres del pueblu. Xulia marchó a les Illes Canaries colos güelos. Sabel y yo marchemos a vivir a Xixón, una ciudá perguapa onde se vive perbién.

EL MOSQUITU GUERRERU

2006-03-02T18:17:00.000+01:00

Los neños de primeru de la ESO tuvieron de facer un cuentín tituláu "El mosquitu guerreru" que tuviere como ingredientes obligatorios: un mosquitu, un lleón y una araña. Los meyores foron estos tres:

Un día, un lleón mui fatu y perbabayu diba pela selva a la gueta la so moza. A ella importába-y muncho’l físicu del lleón y la so imaxe, yá que yera’l rei de la manada.Mentantu caminaba, el lleón notó un ruxe-rux nel aire y miró p’atrás. Nun había naide. Siguió andando y volvió a sentir el mesmu ruiu. Miró detrás d’elli, enfadáu y vio una pequeñina bola de pates prietes esnalando. Yera un mosquitu que-y dixo:
-¿Ónde vas? Voi acompañate.
-Non, una basoria qu’esnala nun me val pa nada, y amás, si me ven contigo, sedré la risa de toos.
-Ye igual, voi dir contigo.
Pero entós, el mosquitu pósase nel culu de la bestia y ésta, enfurruñada, avalánzase sobre’l mosquitu, que marcha esnalando enantes de que llegaren a elli los dientes del lleón. Entós...óyese en tola selva:
-¡Aiiiiiiiiii!, sedrás...
De sópitu, vese un chorru sangre tres del lleón, que como animal fuerte que ye, sigui’l so camín.Pero’l mosquitu pósase darréu na cara’l lleón y píca-y nos papos. Como’l lleón yera alérxicu entamaron a sali-y unos graninos. Fechu una llaceria, sal a ver si pilla al mosquitu, pero ésti cayere dientru una tela d’araña que lu come.
El lleón llega an ca la moza pero esta abandónalu por tener granos na cara.
Sara Moreno Ordóñez
.............................................................................................
Ello yera una vegada que pel branu, nuna selva, taben un mosquitu y un lleón discutiendo . Nesto entamen a llegar dellos animales, qu’animaben pa que se pegaren. Col ánimu del públicu, el mosquitu reta al lleón, pero taba pernerviosu asina que lu pica, y como ye tan pequeñu y esbariosu escapa y el lleón nun lu atrapa.
Como’l públicu animare al mosquitu, el lleón quedó atristayáu y marcha cola cabeza gacha pal árbol qu’había al delláu del ríu a escondese.
El mosquitu, cola gayola de ser victoriosu, saluda despistáu a los otros animales que lu animaren y cai nun tela d’araña que lu come.
Óscar Cano
...........................................................................................

Ello yera una vez un lleón que taba xugando colos collacios y un mosquitu llamáu Pepín, ensin decatase, foi esnalando selemente cerca’l lleón y pícalu. El lleón, rabiosu, persíguelu per tola viesca. Cuando lu atopa ‘l mosquitu píde-y perdón, pero’l lleón nun-y fai casu. El mosquitu, al vese ganador, distrayóse y cayó na rede d’una araña que lu come. El lleón púnxose tan contentu que felicitó a l’araña y ficiéronse amigos. Pero’l mosquitu garró la rabia y maldixo al lleón qu’al ratu tuvo de ser operáu por Lluis, la tortuga. Al final pudo recuperase sele.
Esteban

CELEBRANDO L'ANTROXU

2006-02-27T19:49:00.000+01:00

Los neños de segundu de la ESO quixeron celebrar l'Antroxu y pa ello ficieron una fiestuca en clas. Ente toos llevaron frixuelos, casadielles y otres llambiotaes perbones. Pasémoslo y portáronse perbién. Ficimos fotos. Si quies veles calca equí.

OTRU POEMA

2006-02-08T18:13:00.000+01:00

Una neña de primeru E de la ESO fizo esti poema. Que vos preste y a ver si vos animáis los neños, que paez qu'esto de facer poesía namái ye de muyeres.

INSINE
Yo, cola mirada gacha
tu, cola mirada fixa
si yo suelto una llárima
nun faes sinón sorrime
¡yes la espina de rosa que tengo clavada!

Suelto una risotada
pa nun fundime
paez que tienes alma
yá entames abrazame
¡yes el torbolín qu'empuxa les fueyes cayíes!

Yo, daqué ablayada
entrugo por qué lo ficisti
claro que tu de folgueta
un res respondisti
¡yes la palomba blanca qu'esnala al debalu!

yo sigo insistiendo
anque tu ganes ni gota
dicides acallantame
y con un besu zarrame la boca
¡yes la lluz y la escuridá qu'aposienta mio alma!

De la espina, del vientu, de la palomba, y de la lluz
la felicidá qu'agora tengo
sólo me la disti tu.
Sara Moreno Ordóñez, 1º E

OTRU TRABAYÍN

2006-02-06T19:43:00.002+01:00

Una neña de terceru A fizo esti poema perguapu:

LA MIO MEYOR COLLACIA
Dafechu, la mio meyor collacia,
préstame la so cola pa nalar,
los sos pies pa esplorar
y tien un soníu con tastu a sal.
Si la refuguen, ella mesma amazcárase y llora,
dexando una espluma blanco.
Puede que la conozas
y si non dígotelo.
Nun ye una collacia al azar,
ella diome'l so nome,
ella ye la mio collacia,
la mio collacia, LA MAR.
Marina Mayo, 3º A

TRABAYOS ESCOLARES

2006-02-04T15:47:00.000+01:00

Los rapazos de SEGUNDU y TERCERU de la ESO, tuvieron de facer un trabayín: continuar una historia echándo-y maxinación. Pa ver los meyores resultaos hai que calcar nesti enllace.

LLECTURES PA LA SEGUNDA EVALUACIÓN

2006-01-22T23:43:00.000+01:00

Pa la segunda evaluación, los neños de Llingua Asturiana han lleer ún d'estos llibros que vienen darréu; los que nun lu lleeron na primer evaluación yá saben lo que tienen de facer. Convídovos a que lo intentéis, ye prestoso esto de lleer asina que garrái 'l que más vos preste:
Los de primeru de la ESO:

-Xunta de mitos, de Rafael Cascudo Noceda
-El mercaderu de tormentes, de V.G. Oliva
-Inaciu y la gata, trad.María Asunción Hevia

Los de segundu y terceru de la ESO:

-Fontenebrosa, de Vicente García Oliva
-Lo mio ¿cómu ye?, de Xulio Berros
-Maxa de branu, de Xulio Berros
-¡Muerra la reina de corazones!, de Vicente García Oliva
-Les esperances d'Abu el- Hol, de Xavier Frías Conde
-Morfema, mormefa, mormera, de Carme Martínez
-Misión Pelayo, de Xulio Arbesú

Si vos prestaría ver cómo son les portaes pa facevos una idea del llibru, ponéi la manina equí y calcái. Podréis ver dalgunes.

AFALAGU D'UN LLIBRU

2006-01-22T01:04:00.000+01:00

A los neños,-es de terceru de la ESO que lleeron Fontenebrosa: el reinu de los Silentes na primer evaluación gustó-yos muncho. Una d'elles quixo facer esti afalagu a la novelina de Vicente García Oliva. Ye'l que vien darréu:

Gustóme muncho la historia porque llama l'atención dende la primer páxina y en tol llibru ye mui entretenida.
Nun ye un llibru aburríu; ayúdate a que nun lo seya la gran bayura dibuxos que pues atopar y tamién que los capítulos nos que se divide nun son mui llargos. Dalgunos d'ellos son más estensos qu'otros pero cuando esto ye asina, al final del capítulu siempres pasa dalgo interesante.
Tamién se puen atopar munches descripciones de personaxes que fain mui fácil imaxinátelos.
La llingua qu'utiliza ye percenciella, sacantes unes poques pallabres qu'atopé que me paecieron un migallín difíciles pero que nun torguen pa la bona comprensión del testu.
Paecióme un llibru con una historia intrigante na que unes coses llévente a otres...
Marina Mayo, 3º A.

PRESENTACIÓN DE LOS ALUMNOS DE TERCERU

2006-01-22T00:38:00.000+01:00

Y equí podéis ver a los de terceru de la ESO. Ellos son: Jeni, Adriana, Eva, Quique, Tino, David, Marina, Xurde y Ánxel. Estos tamién van trabayar enforma pa qu'esti blog quede bien guapu :-) . Tamién los podéis ver meyor si pincháis nesti enllace.

PRESENTACIÓN DE LOS ESCOLINOS DE SEGUNDU

2006-01-22T00:16:00.000+01:00

Estos son los neños de segundu de la ESO. Hailos del A, del C, del D y del F. Ellos namás quieren tar de folgueta, pero yá-yos dixo la profe qu'hai que trabayar. Si queréis velos meyor hai que calcar equí.

PRESENTACIÓN DE LOS ESCOLINOS DE PRIMERU

2006-01-13T18:53:00.000+01:00

Equí tenéis la reciella de primeru E de la ESO que van trabayar nesti blog. Si queréis velos a toos más de cerquina, pinchái equí.

TRABAYOS ESCOLARES

2006-01-12T20:17:00.000+01:00

Equí tenéis dos trabayos fechos por una alumna de segundu C de la ESO: un cuentín y un poema.

CUENTU
Un día, taba yo faciendo los deberes y prendí la lluz de la llamparuca, y hacia onde la llámpara dirixe'l focu de lluz veo reflexao na paré una especie de cosadiella que dicía:
"Si un corazón quies ver llatir/solo debes conseguir/d'un rei dalgo verde/que s'atopa na nariz"
Yo tenía ganes d'aventures, asina que me propunxi quita-y un mocu a cualisquier rei. Un cachu más tarde, decatéme de qu'ensin saber qué rei yera, taba perdida. Asina qu'apagué la lluz y volví prendela. Esta vegada dicíame cómo se nomaba aquel rei: NOZAROC. Tamién dicía que vivía nel quintu pisu la mio casa. Esto yera imposible porque solo hai cuatro plantes; sicasí xubí al pisu imaxinariu nel qu'había una puerta.
Tuvi que pensar si entraba o non, pero non tol mundiu tien la oportunidá de ver llatir los corazones, asina qu'entré. Namás entrar vi una piscina con forma pasiellu onde taba'l rei Nozaroc dormíu. Ensin pensalo un momentu, quitéme los zapatos y llancéme al agua. Dempués de tar dos minutos nalando, llegué hasta'l rei y saqué-y el mocu col deu y torné pa casa. Cuando llegué taba como un pitín y con un moquín pegáu al deu. Pa saber lo que tenía de facer con esa masa verde, volví apagar y prender la lluz. Esta vegada dicía que tenía que pegalu na paré. Cuando fui a pegalu nun me fizo falta celu de lo pegañosu que taba. Esperé un cachín y miré pal mio pechu. Ellí taba'l mio coral bombiando 'l sangre a tou meter.Agora voi toles nueches al cuartu los mios pas y veo llatir el corazón de caún al mesmu tiempu.
Llucía Obeso, 2º ESO.

POEMA

2006-01-12T19:47:00.000+01:00

SORRISA NEL CORAZÓN

De la nueche a la mañana
un día nuevu entamó
con una noticia bona
que'l mio pá me contó.

Yeren les seis de la mañana
y la mio ma pal hospital coló,
lo que llevaba na barriga
de sópitu salió.

D'oreya a oreya
una sorrisa pergrande me quedó
pero non solo per fuera
sinón dientro'l corazón.

Agora tien sólo dos años
anque paez que siempre existió,
diz a medies les pallabres
pero yo entiéndo-ylo too.

Descolócame les coses,
quier pa ella lo qu'a mi me vio;
pero cuando pienso nella digo
¡vaya suerte que tengo yo!

Llucía Obeso, 2º ESO.

FINARON LES VACACIONES DE NAVIDÁ

2006-01-10T20:35:00.000+01:00

Neños, neñes, pas, mas, acabaron les vacaciones. Hai qu'entamar otra vegada'l cursu. Nun hai gota gana, yá, pero hai que lo facer. Ánimu, podéis con too.

YÁ TENEMOS FOTO

2006-01-10T19:18:00.000+01:00

Yá teníemos ganes de ver les fotos del insti nel blog. Equí tienes una, pero si quies ver más, de toles maneres (per delantre, dende la ponte naranxa, les canches...), calca equí.